വെള്ളപ്പാണ്ട് (Vitiligo) ചികിത്സാരംഗത്ത് നിർണായക വഴിത്തിരിവായി പുതിയ ഓറൽ (Oral) ഗുളികയായ ‘റിൻവോക്’ (Rinvoq) യു.എ.ഇയിൽ അംഗീകരിച്ചു. എമിറേറ്റ്സ് ഡ്രഗ് എസ്റ്റാബ്ലിഷ്മെന്റ് (Emirates Drug Establishment) ഔദ്യോഗിക അനുമതി നൽകിയതോടെ, വെള്ളപ്പാണ്ട് ചികിത്സയ്ക്കായി ഈ നവീന ഗുളികയ്ക്ക് അംഗീകാരം നൽകുന്ന ലോകത്തിലെ ആദ്യ രാജ്യമായി യു.എ.ഇ മാറിയിരിക്കുകയാണ്.
എന്താണ് റിൻവോക് (Rinvoq)?
ശരീരത്തിന്റെ പ്രതിരോധ സംവിധാനത്തിലുണ്ടാകുന്ന തകരാറുകൾ മൂലം ചർമ്മത്തിന് സ്വാഭാവിക നിറം നൽകുന്ന മെലാനിൻ കോശങ്ങൾ നശിക്കുന്നതാണ് വെള്ളപ്പാണ്ടിന് കാരണമാകുന്നത്. ഇതിനെ പ്രതിരോധിക്കാൻ സഹായിക്കുന്ന ‘ജാക്ക് ഇൻഹിബിറ്റർ’ (JAK Inhibitor) വിഭാഗത്തിൽപ്പെടുന്ന മരുന്നാണ് ‘ഉപഡാസിറ്റിനിബ്’ (Upadacitinib) എന്ന ശാസ്ത്രീയ നാമമുള്ള റിൻവോക്.
പ്രധാന വിവരങ്ങളും സവിശേഷതകളും:
- ആർക്കൊക്കെ ഉപയോഗിക്കാം: 12 വയസ്സും അതിനു മുകളിലും പ്രായമുള്ള, സിസ്റ്റമിക് തെറപ്പി (Systemic therapy) ആവശ്യമായി വരുന്ന ‘നോൺ-സെഗ്മെന്റൽ വിറ്റിലിഗോ’ (Non-segmental vitiligo) ബാധിതർക്കാണ് ദിവസത്തിൽ ഒരിക്കൽ കഴിക്കാവുന്ന ഈ ഗുളിക നിർദേശിക്കുന്നത്.
- ചികിത്സയിലെ മാറ്റം: ഇതുവരെ പുറമെ പുരട്ടുന്ന ക്രീമുകളും (Topical creams) ഫോട്ടോതെറപ്പിയുമായിരുന്നു വിറ്റിലിഗോയ്ക്ക് പ്രധാനമായും ഉപയോഗിച്ചിരുന്നത്. എന്നാൽ ദിവസവും ഒരു ഗുളിക കഴിച്ച് രോഗാവസ്ഥയെ നിയന്ത്രിക്കാനാകുമെന്നത് രോഗികൾക്ക് വലിയ ആശ്വാസമാണ് നൽകുന്നത്.
- പകർച്ചവ്യാധിയല്ല: വെള്ളപ്പാണ്ട് അഥവാ വിറ്റിലിഗോ ഒരു തരത്തിലും തൊട്ടുകൂടായ്മയോ പകർച്ചവ്യാധിയോ അല്ലെന്ന് ആരോഗ്യവിദഗ്ധർ വ്യക്തമാക്കുന്നു.
ഡോക്ടറുടെ നിർദേശം പ്രധാനം:
വിറ്റിലിഗോ ബാധിച്ച എല്ലാ രോഗികൾക്കും ഒരേ ചികിത്സാരീതി അനുയോജ്യമാകണമെന്നില്ല. രോഗ വ്യാപനത്തിന്റെ തോത്, ശാരീരികാവസ്ഥ, മുൻകാല ചികിത്സകൾ എന്നിവ പരിശോധിച്ച് സ്പെഷ്യലിസ്റ്റ് ഡോക്ടറുടെ നിർദേശപ്രകാരം മാത്രമേ അനുയോജ്യമായ മരുന്നുകൾ തിരഞ്ഞെടുക്കാൻ പാടുള്ളൂ എന്ന് ആരോഗ്യ അധികൃതർ മുന്നറിയിപ്പ് നൽകുന്നു.
Recommended for you
Leave a Reply
This site uses Akismet to reduce spam. Learn how your comment data is processed.
