സോഷ്യൽ മീഡിയയിൽ ഒരു വീഡിയോ പ്രത്യക്ഷപ്പെട്ടാൽ കണ്ണടച്ച് വിശ്വസിക്കുന്നവരാണ് നമ്മളിൽ പലരും. കഴിഞ്ഞ കുറച്ചുദിവസങ്ങളായി ടിക് ടോക്കിലും ഇൻസ്റ്റാഗ്രാമിലും യൂട്യൂബിലും കണ്ട് ലക്ഷക്കണക്കിന് ആളുകൾ പരിഭ്രാന്തരായ ഒരു വീഡിയോ ഉണ്ടായിരുന്നു—പേവിഷബാധ (Rabies) ബാധിച്ച് വിചിത്രമായി പെരുമാറുന്ന ഒരു പെൺകുട്ടിയുടെ ദൃശ്യങ്ങൾ. ബംഗ്ലാദേശിലെ കുഷ്ടിയ സ്വദേശിയായ ഈ കുട്ടിയെക്കുറിച്ച് പ്രചരിച്ച വാർത്തകൾ പക്ഷേ തികച്ചും തെറ്റായിരുന്നു!
ധാക്കയിലെ പ്രശസ്തമായ ഇൻഫെക്ഷ്യസ് ഡിസീസ് ഹോസ്പിറ്റലിൽ (Infectious Diseases Hospital, Mohakhali) നടത്തിയ വിശദമായ പരിശോധനകൾക്ക് ശേഷം, കുട്ടിക്ക് പേവിഷബാധയില്ലെന്ന് ഡോക്ടർമാർ ഔദ്യോഗികമായി സ്ഥിരീകരിച്ചു. ബംഗ്ലാദേശിലെ പ്രമുഖ പത്രമായ ‘പ്രഥം അലോ’ (Prothom Alo) ആണ് ഈ വ്യാജ പ്രചാരണത്തിന് പിന്നിലെ യാഥാർത്ഥ്യം പുറത്തുകൊണ്ടുവന്നത്.
എന്താണ് യഥാർത്ഥത്തിൽ സംഭവിച്ചത്?
ആറു മാസം മുൻപ് ഈ പെൺകുട്ടിക്ക് ഏറെ പ്രിയപ്പെട്ട അവളുടെ പേർഷ്യൻ പൂച്ചയെ കാണാതായിരുന്നു. വളർത്തുമൃഗത്തോടുള്ള കടുത്ത വൈകാരിക ബന്ധം കാരണം പൂച്ചയുടെ വേർപാട് കുട്ടിയെ വലിയ രീതിയിൽ മാനസികമായി തളർത്തി. തുടർന്ന് ഫോണിൽ നിരന്തരമായി പൂച്ചകളുടെ വീഡിയോകൾ കാണുന്നതും കുട്ടിയുടെ പതിവായി. ഈ കടുത്ത മാനസിക സമ്മർദ്ദമാണ് പിന്നീട് കുട്ടിയുടെ പെരുമാറ്റത്തിൽ മാറ്റങ്ങളുണ്ടാക്കിയത്.
എന്താണ് ‘ഫങ്ഷണൽ ഡിസോർഡർ’ (Functional Disorder)?
തലച്ചോറിന് ഘടനാപരമായ (Structural) തകരാറുകളോ രോഗങ്ങളോ ഒന്നുമില്ലെങ്കിലും, കടുത്ത മാനസിക സമ്മർദ്ദം കാരണം നാഡീവ്യൂഹത്തിന്റെ പ്രവർത്തനങ്ങളിൽ തടസ്സം നേരിടുകയും അത് ശരീരത്തിൽ ലക്ഷണങ്ങളായി പ്രകടമാകുകയും ചെയ്യുന്ന അവസ്ഥയാണിത് (Functional Neurological Disorder – FND).
ഇത് അഭിനയമല്ല: വ്യക്തി മനഃപൂർവം ചെയ്യുന്നതോ ശ്രദ്ധ പിടിച്ചുപറ്റാൻ അഭിനയിക്കുന്നതോ അല്ല ഇത്. കടുത്ത ഭയമോ സങ്കടമോ ആഘാതമോ കാരണം ഉപബോധമനസ്സ് ശരീരത്തിലൂടെ കാണിക്കുന്ന പ്രതികരണമാണിത്.
പഠനങ്ങൾ പറയുന്നത്: കൗൺസിലിംഗ്, കോഗ്നിറ്റീവ് ബിഹേവിയറൽ തെറാപ്പി (CBT), കൃത്യമായ പരിചരണവും സ്നേഹവും നൽകുന്നതിലൂടെ ഈ അവസ്ഥ മാറ്റിയെടുക്കാൻ സാധിക്കും.
പൂച്ച കടിച്ചാലോ നക്കിയാലോ എന്ത് ചെയ്യണം? (അടിയന്തര മുൻകരുതലുകൾ)
വീഡിയോയിൽ കണ്ടത് വ്യാജ പ്രചാരണമാണെങ്കിലും, പൂച്ചയോ നായയോ കടിച്ചാൽ ഉണ്ടാകുന്ന പേവിഷബാധ (Rabies) വളരെ മാരകമാണ്. വളർത്തുമൃഗങ്ങളോ തെരുവു പൂച്ചകളോ കടിച്ചാൽ അല്ലെങ്കിൽ പോറലേൽപ്പിച്ചാൽ താഴെ പറയുന്ന കാര്യങ്ങൾ ഉടനടി ചെയ്യണം:
മുറിവ് കഴുകുക (ഏറ്റവും പ്രധാനം):
പൂച്ച കടിച്ച ഭാഗം അല്ലെങ്കിൽ നഖം കൊണ്ട് പോറലേറ്റ ഭാഗം കുറഞ്ഞത് 15 മിനിറ്റെങ്കിലും സോപ്പും പൈപ്പ് വെള്ളവും (Running Water) ഉപയോഗിച്ച് കഴുകുക. വൈറസിനെ വലിയൊരു അളവുവരെ നശിപ്പിക്കാൻ ഇത് സഹായിക്കും.
ആന്റിസെപ്റ്റിക് പുരട്ടുക:
കഴുകിയ ശേഷം ഡെറ്റോൾ, സാവ്ലോൺ അല്ലെങ്കിൽ ബീറ്റാഡിൻ പോലെയുള്ള ആന്റിസെപ്റ്റിക് മുറിവിൽ പുരട്ടുക.
ചെയ്യരുതാത്ത കാര്യങ്ങൾ:
മുറിവിൽ എണ്ണ, മഞ്ഞൾ, പച്ചമരുന്നുകൾ, ബാന്റ് എയ്ഡ് എന്നിവ ഇടരുത്. മുറിവ് കെട്ടിപ്പൂട്ടി വെക്കാതിരിക്കാൻ ശ്രദ്ധിക്കുക.
വാക്സിനേഷൻ എടുകുക:
സ്വയം ചികിത്സയ്ക്ക് നിൽക്കാതെ ഉടനടി തൊട്ടടുത്തുള്ള സർക്കാർ ആശുപത്രിയിലോ ക്ലിനിക്കിലോ എത്തി ARV (Anti-Rabies Vaccine) എടുക്കുക. മുറിവിന്റെ ആഴമനുസരിച്ച് ഡോക്ടറുടെ നിർദ്ദേശപ്രകാരം RIG (Rabies Immunoglobulin) നൽകേണ്ടി വന്നേക്കാം.
വളർത്തുമൃഗങ്ങൾക്കും വാക്സിൻ നൽകാണം:
വീട്ടിൽ വളർത്തുന്ന പൂച്ചകൾക്കും നായ്ക്കൾക്കും കൃത്യസമയത്ത് പേവിഷബാധയ്ക്കെതിരെയുള്ള വാക്സിനേഷൻ നൽകിയിട്ടുണ്ടെന്ന് ഉറപ്പുവരുത്തുക.
തെറ്റായ പ്രചാരണങ്ങൾ ഒഴിവാക്കാം
ഒരു വ്യക്തിയുടെയോ കുടുംബത്തിന്റെയോ സമ്മതമില്ലാതെ ഇത്തരം ദൃശ്യങ്ങൾ പ്രചരിപ്പിക്കുന്നതും തെറ്റായ വ്യാഖ്യാനങ്ങൾ നൽകുന്നതും ആ കുടുംബത്തിന് കടുത്ത മാനസിക സങ്കടമുണ്ടാക്കും.
സോഷ്യൽ മീഡിയയിൽ കാണുന്നതെല്ലാം കണ്ണടച്ച് വിശ്വസിക്കാതെ, ശാസ്ത്രീയ വസ്തുതകൾ മാത്രം ഷെയർ ചെയ്യുക. തെറ്റായ വിവരങ്ങളേക്കാൾ വേഗത്തിൽ സത്യം പ്രചരിക്കട്ടെ!
Leave a Reply
This site uses Akismet to reduce spam. Learn how your comment data is processed.
